Mulud At Mɛemmer, ilul ass n 28 Duǧember 1917 deg Tewrirt Mimun, taɣiwant n At Yenni di Tizi Wezzu, d amussnaw ameqqran gar yimussnawen n Lezzayer, yeǧǧa-d i tsutwin tirawin d yinadiyen ussnanen deg waṭas n yiḥricen. Asfugel n umulli wis 100 n tlalit-is, ddaw leɛnaya tunnigt n Uselway n Tegduda, Mass Abdelaziz Bouteflika, d tajmilt n Uwanak i umussnaw. S teɣzi n tudert-is, Mulud At Mɛemmer, yessaweḍ ad d-yerr azal i tutlayt, idles, tasekla d tɣerma n tmaziɣt, am wakken daɣen i yesbuɣer tussna di Lezzayer s tira-s, d ungalen, d timezgunin d tullisin yewwin acḥal d arraz.

Seg useggas n 1962 ar 1973, yesselmed tamaziɣt, ɣer tama n tezrawin i yexdem deg uḥric n tesnalest (anthropologie). Deg useggas n 1969, yuɣal d anemhal n Ummas n Unadi di Tesnalest d Uzermezruy d Tradrumt (CRAPE). Gar 1966 d 1967, yuɣal d imḍebber n Tiddukla n Yimyura Izzayriyen. Deg useggas n 1982, yesbedd di Paris Asemmas n Tezrawin d Yinadiyen ɣef Tmaziɣt (CERAM) akked tesɣunt Awal. Gar yidlisen-is igejdanen ɣef timmuzɣa, Isefra n Si Muḥend u Mḥend (1969), Isefra iqburen n teqbaylit (1980), ideg d-yessekfel isefra n waṭas n yimedyazen am Yusef Uqasi yeddren deg taggara n twinest tis 17. Ahellil n Tgurarin (1984) ideg d-yewwi ɣef tmedyazt taqburt n tniri n Lezzayer. Inna-yas Ccix Muḥend (1990) d adlis ideg d-yewwi tamussni n yiwen n urgaz i d-yeǧǧan lǧerra-s deg umezruy n teqbaylit.

Yumen s ugdud-is i yefkan iseflan ilmend n tlelli, d netta i d-yennan : “Anda yebɣu yessaweḍ-iyi ubrid, anda tebɣu taf-iyi-d tizi n lmut, ad ruḥeɣ lxaṭer-iw yerked, imi ẓriɣ agdud-iw, d wiyaḍ yid-s, akken bɣun ilin wuguren i as-yeffer umezruy, d abrid n tlelli ara yawi. Ahat miḥyaf d ubxaṣ ad d-bedden d aɛekkir di tikli-ines, maca akken yebɣu yiɣzif ubrid, yiwen wass kan ad nefren gar tidet d tkerkas”.

Conception et Hébergement : kdconcept