Asfugel n umulli wis 100 n tlalit n umaru d wemnadi Mouloud Mammeri ad d-yebdu ass n ttlata, 28 Fuṛaṛ 2017 deg Tizi Wezzu, sdeffir ussiweḍ n ṛṛeḥma ay d-yettilin yal aseggas deg Wayt Yanni.
 
Asfugel-a yessuddes-it Useqqmu Unnig i Timmuzɣa ddaw leɛnaya n uselway n tegduda, Mass Abdelaziz Bouteflika, yernu wa d tadyant meɣɣren aydeg ara d-ilin aṭas n yermuden ussnanen d yidelsanen deg wakk timnaḍin n wakal aɣelnaw yernu s teɣzef n useggas n 2017.
 
Menɣir amyalel usrid d yeɣlifen n yedles d ussegmi aɣelnaw, d wudusen ay yeqqnen ɣer-sen, ad ttekkint daɣ aṭas n tiddukliwin tidelsanin.
 
Yessebded-d Useqqamu Unnig i Timmuzɣa yiwen n useqqamu ussnan n ussemyuddes ara d-yelhun s ussemyuddes n yermuden-a s umata. Aṭas n tesdawiyin (Ldzayer, Lemdeyya, Wehṛan, Tizi Wezzu, atg.) ay d-yessumren ad ttekkint deg tedyant-a s ussuddes n tedyanin tidelsanin d tussnanin yemgerraden.
 
Mouloud Mammeri, ay imuhlen aṭas i lmend n weḥraz d tneflit n tutlayt tamaziɣt s yinadiyen d yimahilen-nnes ɣef tjeṛṛumt, tarrayin n usselmed n tutlayt d usegzawal aydeg ay d-yejmeɛ amawal n tentaliwin timaziɣin yemgerraden, mazal nettwali-t, ar ass-a, d aferras deg wenrar n tmaziɣt. Imahilen-nnes ussnanen deg wenrar n timmuzɣa ttɣimin-d d tiɣbula ur yesɛin tamtilt.
 
Seg yidis niḍen, Mouloud Mammeri yura-d daɣ acḥal n wungalen, gar-asen Aɛefyun d Uɛekkaz, Tawrirt Yettwattun (ay d-yuɣalen d usaru), Iḍes n Wuɣdim, Amecwaṛd wacḥal n tmezgunin d wammuden n yisefra d tmucuha tiqburin.
 
S waya, assuddes n tedyant meɣɣren am ta tella-d d ttbut ibanen deg rrbeḥ n yimenɣi n tmeddurt s lekmal-nnes, d win aydeg yella-d, naqal, westeɛṛef s tmaziɣt d taɣelnawt, sakkin yessaweḍ ɣer westeɛṛef s tmaziɣt d tutlayt tunṣibt deg tmenḍawt ay yettwaceggren seg melmi kan. Asfugel n umulli wis 100 n tlalit n Mouloud Mammeri, ddaw leɛnaya n uselway n tegduda, d azmul niḍen n westeɛṛef s umeskar-a ameqran.
 
Iriri n tejmilt i wergaz-a d lwajeb i lmend n ccfawat yernu d ttbut s westeɛṛef s wazal-nnes. Seg yidis niḍen, yella-d daɣ waya d abrid i ukemmel n umahil i wesduqqes d ussugget n unadi deg yinurar yemgerraden n tutlayt d tsekla tamaziɣt.
 
Si El Hachemi ASSAD
 
Amaru Amatu n Useqqamu Unnig i Timmuzɣa
Conception et Hébergement : kdconcept