BGAYET– Assejhed n wemkan n teɣwalt deg wesmal n tmaziɣt yella-d d asentel n yiwen n usarag aɣelnaw ay yebdan ass n laṛebɛa, deg tesdawit n Bgayet, i lmend n ussukku n tiṭ ɣef termitin ay d-yellan deg ttawilat n yisalan (taɣemsa yuran, ṛṛadyu d tliẓri) d yebriden d ttawilat ara yettwasqedcen i lmend n waya.

D amaru amatu n Useqqamu Unnig i Timmuzɣa, Si El Hachemi Assad, ay ireẓmen asarag-a yernu iwekked-d ɣef wecrured ay tebda tmaziɣt deg ttawilat n yisalan, am wakken ay d-yerna dakken, ula ma llan, ass-a, aṭas n yisulal n teɣwalt, maca drusit yisulal ay as-yefkan azal i tutlayt-a. « Wid ay d-yefrurin deg wenrar-a la ttmahalen s tin n weɣnas », ɣef wakken ay d-iwekked Mass Assad, am wakken ay d-iwekked daɣ ɣef « lexṣaṣ deg wenrar n ussileɣ aɣemsan s tmaziɣt ».

« Aṭas (n yineɣmasen) ay ixuṣṣen deg tutlayt ama seg yidis n umawal, ama seg yidis n wenṭaq, ama seg win n tseddast, maca gren iman-nsen deg tirawt s tin n tmara imi ay sɛan agerdas deg tɣemsa. Ma d wiyaḍ sɛan issilɣen ijehden, ladɣa iselmaden d yimezrawen n tmaziɣt, maca ttɣimin-d xuṣṣen deg tmussni n yilugan n ṣṣenɛa (n tɣemsa) », ɣef wakken ay d-yenna yiwen n wemsarag ay d-igren tiɣri i uferru n wugur-a s « ussemres, deg ttawilat n yisalan, n yineɣmasen n tidet ay yessnen tutlayt (tamaziɣt) s tamekt tanablalt ».

Iwekked-d daɣ wemsarag-a ɣef « ussidef n uzegrir n tutlayt d yedles amaziɣ deg wahil n ussileɣ deg teɣwalt, am wakken ay d-iger tiɣri i ussebded n weɣmis anagdud s tmaziɣt aydeg ara ddukklen sin-a n yezmaren ».

I lmend n waya, cekṛen-d kra tarmit n Tneggan Yisalan n Lezzayer deg tɣemsa, ladɣa deg wayen yerzan aqader n yilugan n wesnezwi n telɣut.

Conception et Hébergement : kdconcept