WEHṚAN – Yebder-d yemseḍru Ahmed Rachedi, ass n ssebt, deg tsinimatikt n Wehṛan, amyalel-nnes « urbiḥ » d umaru d wemnadi Mouloud Mammeri (1917-1989).

Deg uttekki-nnes, deg Wehṛan, i lmend n wesfugel n umulli wis 100 n tlalit n Mammeri, yenced-d yemseḍru-a agdud akken ad iẓer afetraw n « Tafejrit n Yimeɣban » ay d-yeffɣen deg 1965 yernu d ameṛḥum ay d-yeɣran awennit-nnes.

Yettekka Mouloud Mammeri deg tirawt n uwennit n ufetraw-a ay d-yellan d « tigejdit taɣemsant n ssinima adzayri », ɣef wakken ay d-yenna Ahmed Rachedi ay d-yessawlen ɣer yidis n umaru amatu n Useqqamu Unnig i Timmuzɣa, Si El Hachemi Assad.

« Ssutreɣ ad t-mlileɣ deg 1964, kra n wayyuren uqbel ma yeffeɣ-d usaru-nni, yernu nella werɛad ur nemyussan imir-nni », ɣef wakken ay d-yenna yemseḍru-a ay d-yernan dakken « Mammeri dindin yeqbel ad d-yaru awennit ».

Kraḍ n wussan sakkin, yewjed-d weḍris-nni, yettwaru-d deg 9 n yisebtar yernu yeɛjeb-as aṭas i yemseḍru ur iɣilen ara dakken ad igerrez akk anect-nni. « Yefka-iyi-d Mammeri awalen ay d-yezgan akken ifaz d usaru-nni », ɣef wakken ay d-yenna Mass Rachedi ay d-yernan dakken yuweḍ armi ay yesseɣta asaru-nni akken ad d-yemyezg xir d uwennit n Mammeri.

Aḍris ay d-yura Mammeri i ufetraw n « Tfejrit n Yimeɣban » yella-d d « anablal », ɣef wakken ay d-yenna Ahmed Rachedi, yernu yenna-d dakken yerna yexdem yid-s i lmend n ussezgi n wungal n « Uɛefyun d Uɛekkaz » akken ad d-yuɣal d asaru.

« Mammeri yenna-d dakken asaru-inu iquder adlis-nnes, menɣir cwiṭ kan n yibeddilen umi nettini ‘anaḍen n ssinima’ », ɣef wakken ay d-yerna yemseḍru-a.

Conception et Hébergement : kdconcept